السلام عليكم
ابدا قصتي هذي انا اتامل انها تعجبكم واذا عجبتكم بكملهاااا.
هاذي قصه بنت يتيمه اسمها هند وحضها قليل فالحياه والمشاكل تحاوطها من كل مكان ، شكلها
حلو واخلاقها زينه والكل يمدحها ، بعد ماخلصت الثانويه دخلت الجامعه ولكثرت ظروفهاا والضغوط
اقدرت تكمل فالجامعه , فاقالت بدور لي مصدر رزق ثاني فحاولت تدور على وظيفه وكل ماقدمت
على وظيفه تستوفى كل الشروط وتحط بياناتها ورقم تلفونها بس مالها حظ فالوظيفه , وكانت تقول
هذا حظي ورزقي انشاء الله بيوصلني وأمل بالله كبير , وفي يوم من الايام وهي نايمه الصبح رن
تلفون جوالها وحصلت رقم غريب قالت برد يمكن وظيفه , ردت عليهم وفيها النعاس ,
هند:الو
المتصل:الو صباح الخير الاخت هند
هند: صباح النور ايوه معاك هند
المتصل: اختي انتي مقدمه عندنا على وظيفه فياليت بكره تمرينا الشغل
هند: انشاء الله اكيد بمركم .......
المتصل : اوكي ننتظرك فمان الله ........ وسكر الخط
هند:الحمد الله ياربي الوظيفه وحصلتها وانشاء الله تتسهل الامور
هند من الفرحه , طار النوم عنهااا وبدت تفكر فالوظيفه واستعدات لها
فاليوم الثاني قعدت بدري وماحصلت الدريول , توهت من قلب نست انه طلب منها يومين اجازه ,
فاقالت لازم ادور على حد يوصلني هاليومين على الاقل ليما يرجع الدريول من اجازته فاطلبت من
عند جيرانهاا حد يوصلها , وحصلت دريول جيرانها بس قالها تنطرين على لاني بوصل العيال
للمدرسه والمدام للوظيفه قالت: مب مشكله المهم احصل حد يوصلني الشغل , فالما وصلت,,
اعتذرت عن التاخير ودخلت ودخلت المقابله , وبعد ماخلصت المقابله قالوا لها : اختي هند انتظري
منا اتصال اليومين المقبلين, ورجعت البيت تفكر هل بيقبلونها ولا لا , واهي محتاجه هالوظيفه ,
مرووو اليومين على هند, وهي قلقه على موضوع الموافقه وكل يوم تنتظر الاتصال ,
وفي ثالث يوم , رن جوالها الصبح وهي نايمه
قالت اكيد الوظيفه, المتصل: اخت هند
هند: ايوه
المتصل : اختي انتي مقبوله عندنا وبامكانك تباشرين عملك من بكره لو حبيتي
هند: الله يبشرك بالخير
سكرت الخط ,,, وحمدت ربها على الوظيفه وقالت انشاء الله بثبت جدارتي وبعوض في شغلي
عن اكمال دراستي فالجامعه , ومررت الايام والا هند صارت موظفه تداوم من الصبح تخلص الظهر
طبعا الكان جديد عليهاا والاشخاص بعد ,,, تعرفت على المكان وعلى طبيعه العمل وعلى مسؤلها
ومكانها كان فيه بنات وشباب وكان الكل محترم نفسه وعلى مكتبه وفي شغله ,, وتعرفت على كم
بنت واسالوها اساله شخصيه ماحبت تجاوب خاصة موضوع انها (يتيمه) ماحبت الموظفين يدرون و
اجمتمع فيهم المدير وقال فيه تغيرات بتصير فالمكان ووجه الكلام لهند وقالها ابي منج ياهند تتعلمين
والي ماتعرفينه تسالين عنه , ووصى الموظفين عليها بانهم مايقصرون معاها,بعد ماخلص الاجتماع
وصلت لمكتب هند ورقه فيها التقسيمات اليديده وشغلها بيكون في مكتب ثاني , بعد ماوصلت
المكتب تفاجات بانه شباب وفيه بنتين واغلب الاحيان يغيبون فاطلبوها عشان تغطي فالشغل
عنهم , ماكانت حابه هالمكان لانه فيه شباب معاها فالمكتب ,و حاولت تتاقلم وقالت انا في بدايه
شغلي لازم اثبت جدارتي وجهدي , وبعدين اذا حسيت هالمكتب ماقدر اكمل فيه بقول للمدير ي
نقلني لمكتب ثاني ,, وكل ماحد دخل المكتب سالها: انتي الموظفه الجديده وتناقلوا الخبر في
كل الاقسام ,ومع الايام صارت ربع مع البنات الي معاها فالمكتب عهود وحنان وصاروااا اكثر من ربع
خاصة بعد ماعرفوا ظروفهاا ,, والشباب بعد ماكانوا يقصرون , الي لفت انتباه هند , واحد من
الشباب الي معاها فالمكتب اسمه (محمد) كل يومين يغيب او يستاذن , تذمرت من تصرفه
واهماله فالعمل,والي استغربت منه اكثر انه محد يتكلم او يشتكي كأنه شي عادي ,وفي يوم
وصلت للدوام بدري وحصلت قدامهاا عهود
فسالتهاا :هالولد اش فيه!!! كله يطلع ومايشتغل؟؟ او يغيب ويخلي الشغل ؟؟ومحد يتكلم عليه .
قالتها عهود: هالولد الي انتي تتشكين منه ظروفه اصعب من ظروفج واهوا يتيم مثلج واهوا المسؤال
عن اخوانه وخواته عشانهم ماتزوج ليما الحين وعشانهم ماقدر يكمل جامعه وانتي لما تشوفينه
يستاذن يطلع يراجع لاخوانه فالمحاكم والاسكان والبنوك لانه هوا الوكيل عليهم ,
سكتت هند وقالت حق نفسها :اش هالصدفه اهوا يتيم وانا يتيمه وفي نفس المكتب ونفس
الظروف والعوائق ولا حسيت عليه انه عنده ظروف وهذا حاله , كبر بعينها لانه شايل المسؤليه وهوا
صغير , وبعدهاا صارت هند تعذره على تغيبه , وماتدري هند انه (محمد) بعد كان مستغرب منها
ويسمع اتصالاتها كلها بيب لكم وبحط لكم وبمر لكم , قال اكيد متزوجه :وتبي اتيب لعيالهاا ويقول
وين زوجها ليش مايب لعياله ,,,
وفي يوم كانوا الشباب فالمكتب مداومين مثل كل يوم، وتاخرت هند على الدوام كانت تعبانه مو
قادره تداوم ,فاتصلت في عهود وقالت لها :اخذي لي اجازه عندي ظروف.
قالت لها عهود : انشاء الله
فا درو الشباب ان هند ماراح تداوم اليوم ,, ومع سوالف الصبح يابو طاري هند ,,طبعاا كان( محمد)
موجود ويسمع ,, فقالت عهود البنت عندها ظروف يفكي انها يتيمه ,, اهني (محمد) استغرب
قال وهوا متفاجأ : يتيمه ........ من تقصدين
قالت: اقصد هند
محمد: هند الي معانا
عهود: ايوه
محمد : بس الحمد الله , الله عوضها بالعيال عزوه لهاا
عهود: تضحك اي عيال
محمد: عيالهاا .... كله اسمعاه تكلمهم وتقول بيلكم
عهود تضحك: ذيلا خواتهاا الصغار يوصونها اتيب لهم لي ردت البيت
محمد: من صجج ...... وانا عبالي عيالها ...... واسال نفسي واقول وين ابوهم ليش ماييب لهم؟؟
عهود: لا حرام البنيه يتيمه بس ماتحب تذكر هالكلام قدام حد ماتحب تشوف نظره الشفقه البنيه
حساسه من هالموضوع,وقالت عهود: وهقتوني وخليتوني اسولف عنها واهي ماتحب حد يسولف
عن حياتها الخاصه لي داومت باجر لحد ايب الموضوع اتفقناا,, قالوا الشباب اتفقناا .
بس (محمد) تم يفكر فالموضووع وفي حياه هند, يقووول اش هالصدفه قاعده قدامي ولا ادري
ويقول الله يعينهااا , تذكر خواته وقال لو انا مو موجود خواتي شلون بيتصرفون في هالحياه
الصعبه!! انا وانا ولد صعبه علي , صج الله يعين هند .
فاليوم الثاني داومت هند , واول ماوصلت المكتب, الكل يصبح علها ويتحمد لها على بالسلامه .
واولهم (محمد) اهي استغربت التصرف وطالعت عهود حصلت عهود تضحك : تقولها بصراحه ياهنوده
فقدناج ,, هند تبي تضيع السالفه و ضحكت قالت: فقدتوني ولا فقدتوا شغلي .
(محمد) تم يطالعهاا ويقول في قبله والله هند ماتستاهل الي يصير لهها طيبه وحبوبه تستاهل
الاحسن والافضل,و اقعدت هند على مكتبها ونزلت شنطتها وبدت تشوف الاوراق الي على مكتبها
من امس تبي تبدي شغلها وارفعت عينها ,وحصلت محمد يطالعها ابتسمت له .
وقالت في نفسها: غريبه محمد مداوم اليوم بدري ,انشاء الله ان ظروفه تعدلت, لانه يستاهل كل
خير, وكملت شغلهاا , وقربت هند من عهود وقالت لها: عهود شسالفه محمد يطالعني صاير شي
امس حد موصله كلام عني يمكن زعلان علي او واصل له كلام غلط .
عهود ردت عليها : يالغبيه لو زعلان كان ماقالج اليوم صباح الخير وحمد الله على السلامه اش فيج
الظاهر المرض اثر عليج , قالت: الظاهر وضحكت على نفسهاا.
وهند قاعده تشتغل الا رن جوال محمد ورد عليه سمعته يقول للمتصل اليوم الصبح ماقدر امرك
عندي شغل العصر بحال امرك وسكر الخط
استغربت هند وقالت الحين محمد عنده شغل ويقعد والله شي غريب
الا الربع الموجودين : اووووه شسالفه اشوووف صرت منضبط
استحى وقال :مافيه شي , واحد ويحاول يعدل يومه فيها شي , الشغل لاحقين عليه مايخلص لو
على شغلي كل يوم بستاذن, وبعدين تعالوا , لا قعدت عجبتكم ولا طلعت عجبتكم .
وهند تسمع ومستغربه من موقفه .
عهود تطالع هند وتضحك عليهاا ، وهند تطالعها وتقول ليش تضحكين من دخلت عليج المكتب اليوم
وانتي تضحكين احس انه فيه شي .قالت لها عهووود اخر الدوام بقولج.
بعد ما انتهى الدوام هند سالت عهود شسالفه يالله قولي الدوام وخلص .
قال عهود: شووفي يا هند السالفه انه امس كنا نسولف فيج ,وفي ظروفج والي ضحكني انه
(محمد) عباله انج متزوجه وعندج يهال, ووضحت له النقطه انج ماتزوجتي ليما الحين وذيلا الي
تكلمينهم خواتج الصغار, واحس من سولفت عنج و(محمد )مهتم فيج وعشان جي اليوم اطالع
(محمد) واهوا مستحي منج وانتي مستحيه منه واضحك.
قالت هند: ايوه (محمد) انا استحي منه ماقدر اطالعه وايد وانتي تدرين اني استحي, وبعدين ليش
تقولين لهم عن ظروفي الله يسامحج .
قالت عهود : يالغبيه لو ماسولفت, كان ماشفتي (محمد) مهتم فيج كل هالاهتمام .
قالت هند: يمكن مب متهم يمكن متعاطف معاي بس .
قالت عهود: تاخر الوقت والدريول عند الباب باجر بنكمل سوالفنا ,انتي ماتصدقيني انه (محمد)
مهتم .فاسلموا على بعض وكل وحده راحت مع دريولهاا للبيت.
بكــــــــــــــــمل القصـــــــــــــــــــــــه بعديــــــــــن .........
قولوا لي رايكم يالي تقرونها وبعدين بكملهاااااااااااااا
الثلاثاء ديسمبر 16, 2008 10:58 pm
بس كمل
